காலணி

காலணி

மிதியடி செருப்பு காலணி
என பெயர் பல இருந்தாலும்
பாதத்தினைப் பாதுகாப்பதால்
பாதரக்ஷை பொருத்தமாகும்..

பதினான்கு ஆண்டுகள்
அயோத்தியை ஆண்டது
ஸ்ரீ இராமனின் பாதுகை இது
இராமாயணக் கூற்றாகும்..

ஆள் பாதி ஆடை பாதி
என்பது பழமொழி
கால் பாதி காலணி மீதி
என்பது எனது புதுமொழி..

துணிமணிகள் போல
அணிகலன்கள் போல
அதிகம் வாங்கப்படுவது
காலணிகள் ஆகும்..

கல்லும் முள்ளும் குத்தாமலிருக்க
குளிரும் வெப்பமும் தாக்காமலிருக்க
காலணி அணிவது அவசியமாம்
கால்களைக் காத்திடும் ரகசியமாம்..

கந்தல் ஆடையும்
தேய்ந்த காலணியும்
வறுமையை விளக்கிடும்
உபகரணங்களாம்..

வசிக்கும் காலனியும்
அணியும் காலணியும்
அவரவர் அந்தஸ்தை
அழகாய் உரைத்து விடும்..

ஒத்த செருப்புக்கு கூட வக்கில்லை
செருப்பு பிஞ்சிடும் போன்ற வசவுகள்
காலணியின் முக்கியத்தினை
சுருக்கமாய் எடுத்துரைக்கும்..

திருமண வீட்டிலும் கோவில்களிலும்
செருப்பினை திருடுவது ஆதி திருட்டாம்
பிடிக்காத மனிதர் மேடையில் பேசிட
செருப்பு வீசுவோர் இன்றும் உண்டு..

கட்டை செருப்புகள் ரப்பர் செருப்புகள்
நெகிழிச் செருப்புகள் தோல் செருப்புகள்
வகை வகையான வடிவம் கொண்டு
கால்களை காத்திடும் கா(ல்) அணிகள்..

எடையைத் தாங்கும் நடையைத் தாங்கும்
கால்களைக் காத்திடும் காலணிகளை
கவுரவப் படுத்திட எழுதிய எனது
கவிதைத் துளிகள்..

அன்பன், சிதம்பரம் ஆர்.வீ.பாலா
17.08.17