தீபாவளி

எங்கே அந்த தீபாவளி
என் சின்ன வயசு தீபாவளி

தீபாவளி வந்தாலே
மத்தாப்பு சந்தோஷம்
வெடிச் சத்தம் எங்கும்
காதினைப் பிளக்கும்

பலகார சட்டியின்
எண்ணெயின் வாசம்
வீதி வரைக்கும் நமது
மூக்கினைத் துளைக்கும்.

புத்தாடை உடுத்திடும்
கனவுகளைக் கண்டு
தூங்காத இரவுகள்
நீங்காத நினைவுகள்.

சில்லறை எடுத்து சென்று
கேப்பு சுருள் வாங்கினோம்
கொஞ்சமாய் பணம் சேர்த்து
ஊசி வெடியும் வாங்கினோம்.

ஒரு மாதம் முன்னதாக
பட்டாசுகளை வாங்கி
வெயிலிலே காய வைத்து
விழித்து கனவு கண்டோம்.

சிக்கனமாய் செலவிட்டு
சிறுக சிறுக வெடி சேர்த்து
தித்திப்பு பலகாரத்துடன்
தீபாவளியை எதிர்பார்த்தோம்.

எங்கே அந்த தீபாவளி
என் சின்ன வயசு தீபாவளி..

அன்பன், சிதம்பரம் ஆர்.வீ. பாலா
03.11.18